Am Samstig hed de Samichlaus de Biber Boris bsuecht und er isch so lieb gsi eus z’säge wo er ihn wirdet träffe. Nachdem mir bim Schulhus Marianum euse Ruef gmacht händ simmer au scho ufbroche und händ denn bim Chindegarte uf de Samichlaus gwartet. Womer denn uf de Samichlaus am warte gsi sind und mer vo wit weg ganz lislig d’Glogge vom Schlutzli ghört hed, isch die suscht so wildi Truppe plötzli nümme so chribelig gsi, meh hämmer alli ghofft das de Samichlaus sich ned z’vill schlächti Sache wärent em letschte Jahr über eus ufgschribe hed.
Wo denn de Samichlaus so vor eus ghocked isch, isch schnell klar worde das er gar ned so en böse isch, nur de Schmutzli hed chli grimmig dri gluegt. Wo denn alli mal bim Samichlaus devore gstande sind und sich use gstellt hed das doch meh gueti als schlächti Sache im letschte Jahr passiert sind, hed eus de Samichlaus en Sack vooolle Nüssli, Manderindli und Schoggi gschänkt.
Sobald mer wider im Pfadiheim zrugg gsi sind hämmers eus lah guet gah und alles was im Sack inne gsi isch ufgässe. D’Schoggi isch scho am beliebtischte gsi aber au d’Nüssli und d’Manderindli sind alli weg cho.
Zum Abschluss hämmer denn zäme mit de Wölf uf de Wise vor dem Schuelhus Marianum no es paar Spili gspillt, euse Ruef gmacht und händ eus denn alli no vonenand verabschidet.
– Fuchs
